Ministria e Shëndetësisë të Kosovës ka publikuar raportin ditor për pasojat e pandemisë dhe rrjedhën e vaksinimit në vend, ku figuron se nga 21 viktimat e koronavirusit, 2 janë nga komuna e Ferizajt.
Prej tyre, një rast i takon grup-moshës mbi 60 vjeç kurse rasti tjetër është i moshës mbi 70 vjeç.
Ditëve të fundit, komuna e Ferizajt po përballet me gjendje të rënduar të pandemisë, pasi vetëm sot,
u konfirmuan 250 raste të reja të infektime, që është njëherazi edhe shifra më e lartë e regjistruar në të gjitha qytetet e Kosovës brenda 24 orëve paraprake.
Në mesin e rasteve të reja janë 27 fëmijë të moshave deri në 19 vjeç, kurse numri më i madh i infektuarve është tek grup moshat prej 20 deri 39 vjeç me 96 të infektuar.
Deri më sot, në Ferizaj janë regjistruar gjithsej 8.315 të infektuar derisa 152 pacientë humbën jetën nga pasojat e infektimit.
Aktualisht në spitalin e Ferizajt janë duke u trajtuar 77 pacientë me Covid-19.
