Asfallti i Rakajve i “bie në qafë” kryetarit Agim Aliu

Njëherë e bllokuan magjistralen Ferizaj – Shkup, ndërsa sot banorët e Rakajve ia zunë derën kryetarit Agim Aliu të frustruar sepse ka dy vjet që mbetën pa rrugë e pa ujë për faj të ekzekutivit lokal.

Derisa ata para hyrjes së Komunës, vendosën parakolp të veturës së dëmtuar, duke shprehur simbolikisht dëmet e përditshme që po i pësojnë nga rruga e shkatërruar, protestuesit thërrisnin që kryetari Aliu të dalë nga zyra dhe t’u japë llogari për hallet e tyre. Mirëpo në vend të kryetarit, qytetarët e mllefosur hasën në barrikadën e policisë, kur filluan edhe shkëmbimet e fjalëve me plot tension.

Pas situatës së krijuar, protestuesit e indinjuar të Rakajve, u futën në objektin e Komunës, ku vazhduan të ngrisin zërin e tyre të pakënaqësisë. Njëri nga ta ishte Vllaznim Kurtaj, banor nga ky fshat.

Vllaznim Kurtaj, banor i Rakajve: Nuk bëhet puna vetëm për vota

“Ne jemi duke e kërku Drejtorin dhe Kryetarin. Pse na kanë zhgënjy qe 22 vjet, rrugën e kemi pasë të asfaltuar, kanë ardhë e kanë dëmtu dhe tash nuk janë duke marrë hapa. Nuk jemi për me ba probleme, por ka dy vjet që është dëmtu rruga. Nuk bëhet kjo punë vetëm për vota, me ardhë dy ditë para zgjedhjeve veç për me na i marrë votat. Ne paguajmë tatim, rrugën na e kanë prishë, ujësjellsin na e kanë lënë në gjysmë”.

Pas gjysmë ore të përplasjes së ashpër verbale me policinë, drejtori i Infrastrukturës në Komunën e Ferizajt, Arbër Bytyqi u detyrua që t’i presë në takim përfaqësuesit e protestuesve, të cilin nuk i ndalnin akuzat për neglizhencë dhe joprofesionalizëm.

Halil Koxha, përfaqësues i protestuesve: Asfallti është bërë zhavor


“Rruga përpara ka qenë asfalt, tash është bërë zallë, zhavor. Problemi është shumë i madh, zhavori po çon pluhur, edhe rruga e prishur, as teshat me i qitë me i terë nuk ka mundësi më. Ju lutem të na bëni zgjidhje sa më të shpejtë sepse është bërë shumë kohë, dy vite”. u shpreh Halil Koxha, një banor tjetër i fshatit Rakaj

Remzi Qeli, një protestues tjetër nga Rakaj, e akuzoi pushtetin lokal se e ka lejuar dëmtimin e rrugës së fshatit

“Zotëri, kanë qitë zhavor mbi asfalt, a jeni të informuar ju të Komunës? Pse me leju ju me ba ktë? Ka mujt me qitë veç aty ku zgjerohet e këtë mos me e prekë mos me e prekë. Pse e keni leju ju si Komunë?/I përgjigjet drejtori Bytyqi: S’e kena leju, s’kena me leju./ Ju është dashtë kur e keni parë se çka është duke bërë me ndalu”.

Drejtori Bytyqi i ndier në siklet, protestuesve u premtoi zgjidhje aty për aty, qoftë edhe me shkëputje të kontratës me kompaninë punëkryese, e cila ka zvarritur punimet në rrugën e fshatit Rakaj.

Drejtori Arbër Bytyqi: Do ta shkëpusim kontratën me kompaninë

“Javën tjetër kemi me e marrë vendimin. Nëse nuk vazhdon me punu në bazë të standardeve kam me qu kërkesën në zyrën e prokurimit për me e shti në listë të zezë. Në momentin që i shkëputet kontrata, ne kemi me gjetë formën që me e shtru së paku një shtresë që ju në dimër mos me hi me pluhur dhe me lloç. Këtë mundemi me e ba ne. Tri javë më herët unë e kam nda menden që është vështirë me punu me këtë kompani” u shpreh drejtori Bytyqi.

Në përfundim të “desantit” të sotëm mbi komunë, protestuesit nga Rakaj dolën me mosbesim duke u deklaruar se do të vazhdojnë me protesta deri në përmbushjen e kërkesave minimale që i ka ky komunitet.
Fshati Rakaj gjendet 7 km në jug të Ferizajt dhe i ka afër 1 mijë banorë.