Prodhuesit e betonit në Kosovë po ankohen për ngritjen e çmimit të cementit.

Për këtë çështje ata edhe i janë drejtuar kryeministrit Albin Kurti me një letër ku thonë se është ngritur çmimi i cementit, si lëndë e parë për prodhimin e betonit.

Ata thonë se çmimet aktuale të cementit janë të papërballueshme meqë nga janari kur çmimi ishte rreth 90 euro për ton tani çmimi ka arritur në rreth 150 euro për ton.

Sipas tre prodhuesve të betonit (IMA Shpk, Bp Construction Shpk dhe Dino Beton), çmimi i cementit është rritur vetëm për Kosovë por jo edhe për vendet e origjinës.

Në letrën drejtuar Qeverisë, këta prodhues tregojnë se 60% të blerjes së cementit vjen nga Sharrcem, 20% nga Fushë Kruja, 10% nga Shkupi dhe 10% nga prodhuesit tjerë të cementit.

Prodhuesit e betonit kërkojnë nga autoriteti i konkurrencës të hetojë këtë dukuri.

Përfaqësuesit e këtij sektori të prodhimit thonë se derisa kanë kontrata të mëhershme për furnizim me beton me çmime më të ulëta, kjo po iu shkakton humbje.

Andaj, sipas tyre nëse qeveria nuk ndërmerren masa për këtë çështje, prodhuesit e betonit do të duhet të ndërpresin aktivitetet e tyre.

Të ngjashme

Të tjera