Arbëri

Vuçiq: Perëndimi kërkon njohjen e gjithçkaje që ata mendojnë se është realitet

Published

3 years ago

10 September, 2022

Presidenti i Serbisë, Aleksandar Vuçiq, ka bërë të ditur se diplomatët evropianë kanë propozuar “kornizë të re” për dialogun mes Prishtinës dhe Beogradit, që ndërmjetësohet nga Bashkimi Evropian në Bruksel.

Ai i ka bërë këto deklarata të shtunën, pas takimit që ka pasur me Këshillin e Sigurisë Kombëtare të Serbisë.

Një ditë më herët, Vuçiq ka pritur në Beograd të dërguarin e posaçëm të Bashkimit Evropian për dialogun Kosovë-Serbi, Mirosllav Lajçak, dhe këshilltarët e sapoemëruar të Gjermanisë dhe Francës për këtë dialog, Jenns Plettner dhe Emmanuel Beaune.

“Sipas tyre [diplomatëve evropianë], dialogu duhet të rezultojë me zgjidhje të menjëhershme dhe përfundimtare, siç thonë ata, të problemeve, me të cilat po përballemi dhe të të gjitha çështjeve të pazgjidhura”, ka thënë Vuçiq më 10 shtator.

Presidenti i Serbisë, Aleksandar Vuçiq, bashkë me të dërguarin e posaçëm të Bashkimit Evropian për dialogun Kosovë-Serbi, Mirosllav Lajçak, dhe këshilltarët e Gjermanisë dhe Francës për këtë dialog, Jenns Plettner dhe Emmanuel Beaune. Beograd, 9 shtator 2022.

Ai ka shtuar se diplomatët evropianë kanë theksuar se e kanë edhe mbështetjen e Shteteve të Bashkuara për diçka të tillë.

“Marrëveshja do të nënkuptonte – nuk mund të them njohje të Kosovës – mirëpo do të ishte njohje të gjithçkaje që ata mendojnë se është realitet’, ka thënë Vuçiq.

Sipas tij, përfaqësuesit evropianë kanë treguar se pozicioni i Perëndimit është se Evropa nuk ka nevojë për konflikte të reja, andaj është shumë e rëndësishme që të gjendet një zgjidhje sa më shpejt që është e mundur.

Vuçiq ka thënë se në takim me diplomatët evropianë ka përsëritur se Serbia nuk do ta njohë Kosovën, por se është e gatshme për zgjidhje kompromisi. Ai nuk ka dhënë detaje se çfarë nënkupton me zgjidhje kompromisi.

Duke folur pas takimit me Këshillin e Sigurisë Kombëtare, Vuçiq, po ashtu ka thënë se fuqitë e mëdha perëndimore, plus Turqia, besojnë se zgjidhja e mundshme e çështjes së Kosovës përmes pavarësisë së saj, do t’i jepte përgjigje edhe presidentit rus, Vladimir Putin në lidhje me Krimenë.

“Pas kësaj, ata do të thoshin: Nëse Krimeja dhe Ukraina arrijnë marrëveshje, atëherë mundet, por pa të nuk është e mundur. Pra, ne jemi bërë dëm kolateral i konflikteve të mëdha dhe sjelljes së tyre joparimore nga e kaluara”, ka thënë Vuçiq.

Sipas tij, diplomatët evropianë kanë thënë po ashtu se presidenti Putin “e ka ngritur perden dhe se u mbetet vendeve të deklarojnë se në cilën anë duan të jenë”.

Serbia është i vetmi vend në Ballkan që nuk i ka vënë sanksione Rusisë, për shkak të pushtimit të Ukrainës.

Tre diplomatët evropianë kanë qëndruar më 9 shtator edhe në Kosovë, ku kanë takuar kryeminisrin Albin Kurti.

I dërguari i Posaçëm i BE-së për dialogun Kosovë-Serbi, Mirosllav Lajçak, dhe këshilltarët e sapoemëruar të Gjermanisë dhe Francës për këtë dialog, Jenns Plettner dhe Emmanuel Beaune, Prishtinë 9 shtator 2022.

Me ndërmjetësimin e BE-së, Kosova dhe Serbia janë në negociata për normalizimin e marrëdhënieve qysh në vitin 2011. Ato kanë arritur dhjetëra marrëveshje, por zbatimi i tyre në terren ka ngecur.

Më 4 shtator, presidenti i Francës, Emmanuel Macron, dhe kancelari i Gjermanisë, Olaf Scholz, kanë emëruar këshilltarët e tyre për të ndihmuar këtë dialog.

Në një letër dërguar Kurtit dhe Vuçiqit po atë ditë, Macron dhe Scholz kanë thënë se normalizimi i marrëdhënieve midis Kosovës dhe Serbisë është thelbësor për Ballkanin Perëndimor.

Ata, po ashtu, u kanë bërë thirrje liderëve të Kosovës dhe Serbisë që të tregojnë vendosmëri dhe gatishmëri maksimale për të ndërmarrë vendime të vështira, të cilat, sipas tyre, do të çonin drejt normalizimit të marrëdhënieve.

Kosova thotë se dialogu duhet të përfundojë me njohje reciproke; Serbia kundërshton.

Kosova ka shpallur pavarësinë në vitin 2008, nëntë vjet pas përfundimit të luftës së iniciuar nga regjimi i atëhershëm serb.

Pavarësia e Kosovës është njohur nga 117 shtete të botës.

Gjykata Ndërkombëtare e Drejtësisë ka konstatuar në vitin 2010 se pavarësia e saj “nuk bie ndesh me ligjin ndërkombëtar”./REL

Arbëri

Ndahet nga jeta gazetari dhe publicisti i njohur shqiptar, Artur Zheji

Published

4 weeks ago

23 August, 2025

Redaksia

Është ndarë nga jeta gazetari dhe publicisti i njohur shqiptar, Artur Zheji.

Sipas mediave shqiptare, Zheji vdiq pas një sulmi kardiak derisa ishte me pushime me familjen në Sarandë.

Në raportin e cituar të Policisë së Shqipërisë, bëhet e ditur se rasti ka ndodhur në afërsi të një restoranti në rrugën “Butrinti” pasditen e së shtunës. Sipas Policisë, Zheji vdiq gjatë rrugës për në spital.

Artur Zheji ishte një nga figurat më të njohura të medias shqiptare, i angazhuar për dekada si gazetar, analist dhe drejtues emisionesh politike.

Që nga viti 2017, ishte drejtues i emisionit politik dhe analitik 360 Gradë, i cili transmetohej në televizionin ABC News.

Ai u lind më 29 gusht 1961 dhe ishte i biri i autorit Petro Zheji e aktores Besa Imami.

Arbëri

Tërmeti me magnitudë 3.6 shkallë lëkund Krujën

Published

1 month ago

15 August, 2025

Redaksia

Një tërmet me magnitudë prej 3.6 shkallë të Rihterit ka goditur Krujën me rrethinë, derisa lëkundjen janë ndjerë edhe në Tiranë.

Sipas Qendrës Sizmologjike Euro-Mesdhetare, tërmeti u regjistrua këtë mbrëmje, në orën 18.24 minuta sipas kohës lokale kurse epiqendra e tij ishte 7 kilometra në jug-jugperëndim të Krujës, respektivisht rreth 16 kilometra në veriperëndim të Tiranës.

Paraprakisht, një lëkundje tjetër me intensitet më të ulët, prej 2.2 shkallë të Rihterit u regjistrua në orën 16:14.

Nuk ka ndonjë raportim për dëmet eventuale.

Arbëri

Një i vdekur teksa Shqipëria vazhdon luftën me zjarret

Published

1 month ago

13 August, 2025

Redaksia

Shqipëria është duke u përballë me një gjendje të vështirë zjarresh, si pasojë e të cilave një person ka humbur jetën dhe disa të tjerë kanë kërkuar ndihmë në ditët e fundit.

Tridhjetë e shtatë vatra zjarri janë evidentuara në mbarë vendin, nga të cilat 30 mbeten aktive, njoftoi Ministria e Mbrojtjes e Shqipërisë të martën mbrëma.

Flakët kanë përfshirë disa qarqe, duke rrezikuar banesa, sipërfaqe pyjore e zona të mbrojtura, ndërsa një i moshuar ka humbur jetën në një fshat të të Gramshit në qarkun e Elbasanit.

Gjatë natës, për shkak të tymit dhe kushteve të krijuara nga flakët, rreth 10 qytetarë, përfshirë 4 ushtarë, kanë marrë ndihmë mjekësore në qytetin e Delvinës, ku banorët u detyruan të largohen nga shtëpitë e tyre.

Zjarrfikësit po ndihmohen edhe nga pjesëtarë të Forcave të Armatosura të Shqipërisë dhe nga helikopterë.

Autoritetet paralajmërojnë se, për shkak të erërave të forta dhe temperaturave të larta, rreziku i përhapjes së zjarreve mbetet i lartë dhe kërkojnë bashkëpunim maksimal nga qytetarët për evakuim dhe shmangie të rrezikut.

Zonat më të prekura përfshijnë qarkun e Elbasanit, ku forcat zjarrfikëse dhe 150 trupa tokësore po luftojnë me flakët në Skënderbegas e zonat përreth. Situata ka detyruar autoritetet të evakuojnë banorët, ndërsa është kërkuar ndërhyrja e 50 pjesëtarëve të Forcave të Armatosura, sipas Ministrisë së Mbrojtjes.

Në Vlorë, zjarri në Finiq po kërcënon Parkun Natyror të Syrit të Kaltër. Në terren po operojnë zjarrfikës nga disa bashki, të mbështetur nga mjetet ajrore shqiptare dhe ndërkombëtare, përfshirë avionë PZL nga Greqia dhe helikopterë nga Çekia e Sllovakia, tha ajo.

Në Berat, situata në Poliçan është përshkallëzuar, duke rrezikuar disa fshatra. Autoritetet kanë bërë thirrje për evakuim të menjëhershëm në zonat e rrezikuara.

Në kryeqytet, Tiranë, disa vatra janë shuar, por Mali i Bërzhitës dhe disa fshatra të tjerë vijojnë të digjen, thuhet në njoftimin e Ministrisë.

Shkodra, Gjirokastra dhe Korça raportojnë vatra të mëdha, shpesh të paarritshme për mjetet tokësore për shkak të terrenit të vështirë, ndërsa në Parkun Natyror të Gërmenjit ndërhyrja pengohet edhe nga prania e predhave të vjetra.

Forcat e angazhuara për shuarjen e zjarreve përfshijnë qindra efektivë të Forcave të Armatosura, zjarrfikës nga të gjitha qarqet, forca policore, punonjës bashkish dhe dhjetëra vullnetarë. Dhjetëra automjete zjarrfikëse dhe mjete të rënda janë në operacion. Nga ajri po veprojnë 2 helikopterë Black Hawk nga Emiratet e Bashkuara Arabe, 1 nga Çekia, 1 nga Sllovakia dhe 1 nga Forcat e Armatosura të Shqipërisë.

Shqipëria është përballur me zjarre aktive në javët e fundit dhe autoritetet i arrestuan në fund të korrikut 18 njerëz nën dyshimet për zjarrvënie në pjesë të ndryshme të vendit.

Ndërkohë, me zjarre janë duke u përballur edhe vendet e tjera të Ballkanit, përfshirë Kosovën dhe Malin e Zi.

| Radio Evropa e Lirë