Connect with us

Arbëri

Skandal në ShSKUK – Pacientët me kancer mbesin pa terapi, zyrtari s’e lexoi emailin për tri javë

Published

on

Ka më shumë se dy muaj që pacientët me kancer të veshkës dhe ata me kancer të mëlçisë kanë mbetur pa trajtim për shkak të mungesës së medikamentit sorafenib në klinikën e Onkologjisë në QKUK.

Në interesimin e mediumit lidhur me këtë problematikë, ShSKUK-ja disa herë gjatë verës është arsyetuar se lënda është në Organin Shqyrtues të Prokurimit dhe se po pritet  vendimi i tij, që pastaj të mund të furnizohet me këtë medikament.

Por nga komunikimi ynë me OSHP-në, del se ky organ e kishte njoftuar Shërbimin spitalor përmes email-it për vendimin e vet më 18 Gusht 2022, ndërsa prokurimi i spitaleve e kishte lexuar me vonesë prej tre javësh, edhe pse ky medikament është esencial  për këtë kategori pacientësh.  

“Duke ju përgjigjur kërkesës tuaj, po ju njoftojmë se OSHP ka lëshuar vendimin me nr. 192/22 me datën 18.08.2022 (para 22 ditëve) me të cilin është njoftuar edhe SHSKUK-ja dhe e njëjta ka mundur të procedojë më tutje“, thuhet në përgjigjen e OSHP-së.

Nga emaili i OSHP-së dhe nga përgjigja e zyrtarit te prokurimit ne SHSKUK,  e kuptojmë se për Shërbimin Spitalor të Kosovës më me prioritet është mbarëvajtja e pushimeve te zyrtarëve te prokurimit sesa angazhimi serioz për sigurimin e medikamentit kritik për pacientet me kancer, pasiqë emaili zyrtar i kësaj rëndësie nuk ishte lexuar fare gjate pushimeve verore.

Ne letrën e OSHP-se me tutje thuhet:

“Duke pasur parasysh faktin se bëhet fjalë për ilaçe shumë specifike, OSHP sot ka reaguar menjëherë duke kërkuar sqarim te SHSKUK-ja, dhe të njëjtit e kanë pranuar se nuk e kanë vërejtur vendimin të cilin e kemi dërguar tek SHSKUK-ja, me arsyetimin se kemi qenë në pushim vjetor dhe nuk e kemi parë“, shton OSHP-ja.

Nga kjo neglizhencë, me siguri përfiton dikush: farmacitë private, sepse  pacientët janë të detyruar që këto barna të shtrenjta me mijëra euro t’i blejnë në sektorin privat.

Për dëmin që iu shkaktua pacientëve me këtë neglizhencë nga ana e Shërbimit Spitalor të Kosovës, ky institucion nuk pa përgjigje por vetëm na u dërgua një email formal zyrtar duke dhënë sqarime procedurale te tenderit, pa asnjë sqarim tjetër. 

Krejt çka mori si përgjigje TV TEMA është një deklarim i Selami Krasniqit, shef i Prokurimit në ShSKUK i cili ndër të tjera shkruan “Pas ankesës në OSHP të njërit nga Operatoret Ekonomik në procedurë lënda është bllokuar në OSHP për një kohë të gjatë në mungesë të bordit të OSHP-së. Pas pranimit të vendimit të OSHP-së me të cilën ankesa cilësohet si e jashtafatshme për trajtim nga OSHP, AK-SHSKUK  e ka anuluar procedurën në fjalë dhe ka iniciuar procedurë të re për furnizim me këtë produkt e cila do të kryhet brenda afatit sa më të shkurtër kohor“.

Në anën tjetër, drejtori i Klinikës së Onkologjisë, Arben Bislimi megjithatë tregon se sorafenibi është ndër të vetmit medikament me të cilin mund të trajtojnë pacientët me kancer të veshkave dhe mëlçisë.

“Është medikament, është ilaç i listës esenciale dhe si i tillë, kur kemi në klinikë pacientët përfitojnë nga ky  medikament. Është target terapi, jo si kimio e të tjera por targeton qeliza e këqija, ato malinje e duke i kursyer ato të mirat, është tretman bashkëkohor i këtyre dy indikacioneve e mos të them ndoshta edhe i vetmi“, deklaroi Bislimi.

Bislimi tregon se këto dy lloje të karcionomave nuk kanë treguar rezultate të mira nga kimioterapia dhe rrezatimi prandaj edhe sorafenibi është shumë i rëndësishëm për këta pacientë, teksa ndalimi i marrjes së këtij medikamenti për një kohë të gjatë mund të shkaktojë dëme.

“Për dallim prej kimioterapisë ku duhet strikt të ndiqet kursi i tretmanit varësisht nga protokolli, këtu kemi të bëjmë me target terapi dhe ndoshta është një komoditet më i madh nëse ka ndërprerje të tillë por prap nuk mund të themi kur është një ndërprerje më e madhe se dy muaj. Mundësia e përzgjedhjes me diçka tjetër nuk na jep shumë hapësirë tek këto dy indikacione. Ndoshta një target tjetër, sunitinib i cili edhe mund të përdoret por nuk e praktikojmë të kalojmë nga një linjë në tjetrën ashtu aq lehtë sepse mënyra e ndjekjes  e humb kontinuitetin dhe efektshmërinë e ilaçit“, shtoi Bislimi.

Se a do të merren masa për neglizhencën e ketij lloji nga institucioni pergjegjes, për dëmin e shkaktuar pacientëve dhe rrezikimin e jetës se tyre, mbetet të shihet nga veprimet e SHSKUK dhe Minisitrisë së Shëndetësisë gjate ditëve ne vijim.

Arbëri

Ish-zëvendëskryeministrja Balluku akuzohet zyrtarisht për pesë vepra penale

Published

on

Prokuroria e Posaçme kundër Korrupsionit dhe Krimit të Organizuar në Shqipëri (SPAK) ka akuzuar zyrtarisht ish-zëvendëskryeministren Belinda Balluku për pesë vepra penale.

Sipas njoftimit, ajo akuzohet për shkelje të barazisë në tenderë, korrupsion pasiv, deklarim i rremë i pasurisë dhe pastrim parash.

Akuza e parë ndaj Ballukut u ngrit në tetor të vitit të kaluar. Asokohe, me vendim të Gjykatës së Posaçme, ajo u pezullua nga detyra e zëvendëskryeministres dhe ministres së Infrastrukturës dhe Energjisë, si dhe ndalimin e daljes jashtë shtetit.

Në dhjetor të vitit 2025, SPAK i kërkoi Kuvendit të Shqipërisë heqjen e imunitetit të Ballukut për të mundësuar arrestimin e saj, por kjo kërkesë nuk u aprovua pasi deputetët socialistë votuan kundër heqjes së imunitetit.

Continue Reading

Arbëri

Rama paralajmëron masa ndaj protestuesve, shqyrton uljen e moshës për përgjegjësi penale

Published

on

Kryeministri i Shqipërisë, Edi Rama, paralajmëroi masa penale dhe administrative ndaj personave që kanë shkaktuar dëme gjatë protestave të ditëve të fundit, ndërsa tha se qeveria po shqyrton edhe mundësinë e kufizimit të rrjeteve sociale për fëmijët nën moshën 16-vjeçare.

Që nga 13 tetori, mijëra njerëz kanë protestuar fillimisht në Tiranë e pastaj edhe në qytete të tjera, nxitur nga pakënaqësitë e studentëve për kostot e arsimit, kushtet në universitete dhe mungesën e perspektivës ekonomike.

Protestat u zgjeruan shpejt, duke përfshirë qytetarë që kundërshtojnë koston e jetesës, korrupsionin dhe mënyrën e qeverisjes. Protestuesit kërkojnë dorëheqjen e Ramës dhe të qeverisë së tij.

Por, pavarësisht protestave dhe kërkesave për dorëheqje, Rama nuk dha asnjë sinjal se do të tërhiqet nga posti. Ai tha se është i gatshëm të dëgjojë edhe qytetarët që kërkojnë largimin e tij, por këmbënguli se ndryshimet politike nuk mund të imponohen përmes dhunës.

Si ftesë për dialog, të martën, ai vendosi disa fleta me mbishkrimin “DIALOG” në disa karrige para objektit të Kryeministrisë në Tiranë. Këto karrige u rrëzuan nga protestues pak orë më vonë. Gjatë protestës të së martës, Policia përdori topa uji dhe gaz lotsjellës për të shpërndarë protestuesit pasi ata hodhën gurë gjatë tubimit para Ministrisë së Arsimit. Protestën tani po e mbështesin edhe pedagogët që kanë dalë në protestë mëngjesin e së martës.

Ndërsa, duke folur në Ministrinë e Arsimit, së bashku me ministren Mirela Kumbaro Furxhi dhe drejtues të shkollave të mesme të Tiranës, Rama mbrojti reagimin e policisë – që është kritikuar për përdorim të dhunës së tepruar ndaj protestuesve – dhe i cilësoi protestat si përpjekje për destabilizimin e vendit.

Ai paralajmëroi një pako masash që, përveç përgjegjësisë penale, do të përfshijë edhe detyrimin për të kompensuar dëmet materiale. Sipas tij, përgjegjësia për dëmet e shkaktuara nga të miturit duhet të përfshijë edhe prindërit.

“Po e studiojmë dhe do ta shohim nëse do të duhet ta ulim moshën për dënimin penal, siç thashë që po e bën një sërë vendesh”, tha Rama, i cili shtoi se mund të kufizohet edhe përdorimi i rrjeteve sociale për fëmijët nën 16 vjeç.

Aktualisht, sipas Kodit Penal të Shqipërisë, përgjegjësi penale për kryerjen e një krimi kanë personat që kanë mbushur 14 vjeç, ndërsa për kundërvajtje penale ata që kanë mbushur 16 vjeç.

Gjatë këtyre ditëve, në rrjete sociale kanë qarkulluar edhe informacione të pavërteta ose të pakonfirmuara kundër Qeverisë së Ramës, disa prej të cilave janë përgënjeshtruar edhe nga organizata për kontrollimin e fakteve.

Gjatë konferencës, Rama përsëriti pretendimet se pas dhunës qëndrojnë aktorë politikë dhe të huaj, pa paraqitur prova publike për këto akuza.

Të hënën, në ditën e shtatë të protestave, policia ndërhyri më herët për të shpërndarë turmat dhe për të penguar grumbullimin e protestuesve. Gjykata e Apelit në Tiranë u godit me gurë, ndërsa në mbrëmje pati përplasje pranë Ministrisë së Brendshme.

Sipas autoriteteve, pesë persona u arrestuan pas incidentit në Gjykatën e Apelit dhe 15 të tjerë u shpallën në kërkim. Në mesin e të arrestuarve ishte edhe një 16-vjeçar.

Më 20 tetor, Policia e Shtetit tha se gjatë protestës të së hënës numri i përgjithshëm i të arrestuarve ishte 33, përfshirë edhe gjashtë të mitur të moshave 15 dhe 17 vjeç. Ndërkaq, janë proceduar penalisht 44 persona.

Ata dyshohet se gjatë protestës kanë hedhur gurë dhe sene të tjera të forta drejt policisë si dhe kanë ndezur koshat e mbeturinave dhe kanë dëmtuar sinjalistikën rrugore.

“Si pasojë e sulmit dhe dhunës nga ana e personave të maskuar dhe të dhunshëm gjatë tubimit të djeshëm, janë dëmtuar shtatë punonjës policie”, tha Policia e Shtetit.

Ndërkaq, në shtatë ditët e protestës, sipas Policisë shqiptare janë arrestuar 271 persona. Sipas autoriteteve, 51 prej tyre kishin të kaluar penale, përfshirë edhe vrasje.

Ndërkaq, deri të dielën, autoritetet kishin ngritur akuza penale ndaj 388 personave në lidhje me protestat. Ndërkohë, shtatë policë ishin pezulluar nga detyra në pritje të hetimeve për dyshime për përdorim të tepruar të forcës.

Bashkimi Evropian dhe Ambasada amerikane në Tiranë kanë bërë thirrje për vetëpërmbajtje, respektim të së drejtës për protestë paqësore dhe përdorim proporcional të forcës nga autoritetet.

| Radio Evropa e Lirë

Continue Reading

Arbëri

Trazirat shpërthejnë përsëri në protestën antiqeveritare në Tiranë

Published

on

Mijëra të rinj shqiptarë u mblodhën të shtunën para Ministrisë së Arsimit, në qendër të Tiranës, në ditën e pestë të një lëvizjeje studentore që po merr hov, kundër Qeverisë së kryeministrit Edi Rama.

Protesta u përshkallëzua në dhunë kur një grup të rinjsh të maskuar hodhën gurë drejt policisë së trazirave, e cila u kundërpërgjigj me granata trullosëse, gaz lotsjellës dhe topa uji.

Protesta e sotme u thirr si tubim gjithëpërfshirës kombëtar, ku përveç studentëve dhe gjimnazistëve, pritej të merrnin pjesë edhe qytetarë dhe përfaqësues të ndryshëm nga diaspora.

Protestat kundër korrupsionit dhe mungesës së vendeve të punës kanë nisur të përhapen në mbarë Shqipërinë, por Rama i ka hedhur poshtë thirrjet për dorëheqje.

Sipas të dhënave të Policisë, deri më tani janë ndaluar 500 protestues, 330 prej të cilëve janë liruar. Rreth 120 policë dhe 45 protestues janë regjistruar si të lënduar, ndonëse ka të ngjarë që shumë raste të lëndimeve të protestuesve të mos jenë regjistruar.

Avokati i Popullit, Endrit Shabani ka publikuar gjetjet paraprake të monitorimit të kryer gjatë katër ditëve të protestave në vend, duke gjetur shqetësime që lidhen me kushtet e ndalimit, trajtimin e të miturve dhe pretendimet për përdorim të dhunës ndaj personave të privuar nga liria.

Në një deklaratë për mediat, Shabani bëri të ditur se ekipet e Mekanizmit Kombëtar për Parandalimin e Torturës kanë monitoruar situatën në komisariatet nr. 1 deri në nr. 6 në Tiranë, në Bllokun e Sigurisë, në Spitalin e Traumës, si dhe në komisariatet e Korçës, Vlorës dhe Shkodrës.

Sipas Avokatit të Popullit, gjatë 72 orëve të fundit janë kontaktuar 214 persona të ndaluar, ndërsa janë zhvilluar intervista konfidenciale me të arrestuar, të shoqëruar, persona të lënduar, mjekë dhe psikologë.

Shabani njoftoi gjithashtu se vetëm në datat 14 dhe 15 tetor, në Spitalin e Traumës kanë marrë shërbim 128 persona, prej të cilëve 86 punonjës policie, 38 protestues dhe 5 të mitur.

Avokati i Popullit dënoi të gjitha format e dhunës që kanë shoqëruar protestat e ditëve të fundit.

“Dënojmë dhunën ndaj policëve. Dënojmë dhunën ndaj protestuesve. Dënojmë dëmtimin e pronës publike dhe të pronës private, përfshirë bizneset”, thuhet në deklaratë.

Cilat janë kërkesat e protestuesve?

Studentët thonë se protestojnë kundër kostove të larta të arsimit dhe korrupsionit qeveritar, ndërsa kërkesë kryesore kanë dorëheqjen e Qeverisë së udhëhequr nga Edi Rama. Atyre u janë bashkuar edhe nxënës të shkollave të mesme. Mësimi është bojkotuar në universitete në Tiranë dhe në disa qytete të tjera, si dhe në disa gjimnaze të kryeqytetit.

Ata thonë se janë të zemëruar edhe për shitjen e zonave të paprekura të bregdetit shqiptar për ndërtimin e një kompleksi turistik luksoz, të mbështetur nga Jared Kushner, dhëndri i presidentit amerikan Donald Trump.

Trazirat përbëjnë sfidë për Ramën, i cili fitoi mandatin e katërt vitin e kaluar, duke premtuar se do ta udhëheqë Shqipërinë drejt anëtarësimit në Bashkimin Evropian. Ai synon që vendi të anëtarësohet në BE që në vitin 2028.

Më herët të premten, Rama bëri thirrje për qetësi dhe fajësoi “duart e huaja” për trazirat e dhunshme disaditore. Ai nuk i identifikoi ato, por tha se po synojnë të pengojnë përpjekjet e vendit të tij për t’u anëtarësuar në Bashkimin Evropian.

“Këto janë duar të huaja që nuk e duan Shqipërinë të qetë”, tha ai në një video të publikuar në faqen e tij në Facebook.

Rama këmbënguli se protestat nuk kanë të bëjnë “fare me hallet, me problemet, me aspiratat legjitime të gjithkujt që dëshiron një jetë më të mirë”.

“E gjithë kjo është po ajo dorë, po ajo dorë që e ka kapur për fyti opozitën shqiptare, dhe që e ka djegur dhe shkatërruar jo një herë Shqipërinë, dhe që është gati ta djegë e ta shkatërrojë përsëri, për të mos e lënë të bëjë përpara”, tha ai.

| Radio Evropa e Lirë

Continue Reading

Trending