Qeveria e Kosovës ka dërguar në Kuvend Projektligjin për ndarjet buxhetore për vitin 2024.
Në takimin e sotëm të qeverisë kryeministri Albin Kurti, ka thënë se buxheti për vitin 2024 do të jetë 3 miliardë e 314 milionë euro.
Kurti bëri të ditur se me këtë Projektligj parashihet që koeficienti i pagave në sektorin publik do të jetë 110 euro.
“Për sektorin publik, kemi thënë qysh në fillim të këtij vitit se koeficienti i pagave për vitin 2024 do të jetë 110 euro dhe këtë po e realizojmë, pra po i rrisim pagat në sektorin publik, ashtu siç kemi thënë”, është shprehur Kurti.
Ai ka thënë se për vitin e ardhshëm buxheti për sektorin e sigurisë do të jetë për 22% më i lartë se në atë paraprak.
“Buxheti për Ministrinë e Punëve të Brendshme për herë të parë do të kalojë 216 milionë euro. Ndërsa për Ministrinë e Mbrojtjes do të jetë mbi 153 milionë euro apo rreth 370 milionë euro për sektorin, e që i bie 22 për qind më shumë sesa vitit 2023”, ka deklaruar kryeministri Kurti.
