Kosovë

Vuçiqi i quan gënjeshtarë QUINT-in, BE-në dhe Kosovën

Published

3 years ago

27 October, 2022

Presidenti i Serbisë, Aleksandar Vuçiq, ka thënë se Serbia vazhdimisht po kërkon targa KS me status neutral, porse kjo po refuzohet.

Vuçiqi thotë se u ka bërë me dije përfaqësuesve të vendeve të QUINT-it se është gënjeshtër që Kosova ka të drejtë për veprimet e saja në lidhje me riregjistrimin.

“Ajo që po flet QUINT-i, BE-ja dhe Prishtina nuk ekziston askund. Ata shpikën legjitimitetin. Për këtë nuk mora përgjigje”, ka thënë Vuçiq, pas takimit të Këshillit të Sigurisë Kombëtare. “Para disa ditëve mora një demarsh nga përfaqësuesit e vendeve të QUINT-it dhe të BE-së. Në atë akt, në pikën dy thuhet se veprimi i Kosovës është legjitim, por problemi është në kohën dhe metodat. Ata nuk kanë të drejtë të bëjnë këtë, sipas asnjë marrëveshjeje. Ata shpikën gjithçka. U thash se po mashtronin publikun, ua theksova dhe nuk u interesuan. Ata mund të jenë arrogantë”.

Vuçiq ka thënë se” mesazhi për serbët në Kosovë e M. është se ne nuk jemi me ta për të qenë kur është e lehtë dhe për të vënë parulla nëpër lokale, por edhe kur është e vështirë”.

Presidenti serb ka thënë se ka dëgjuar kërkesat e përfaqësuesve serbë të Kosovës.

“Ata na informuan për nevojat dhe gjithçka me çfarë po përballen, veçanërisht para skadimit të ultimatumit të dhënë nga regjimi i Prishtinës për ata në veri të Kosovës, që i referohet konfiskimit të automobilave me targa të lëshuara në Serbi, të ashtuquajtura targa KM, prej të cilave janë rreth 9 mijë”, tha Vuçiq.

Ai ka thënë se vetëm 18 persona i kanë riregjistruar veturat, prej tyre tre nga veriu i Kosovës.

Vuçiq ka thënë se “serbët në Kosovë do t’i rezistojnë paqësisht autoriteteve të Prishtinës”.

“Sigurisht se do të hasin në rezistencën demokratike të popullatës serbe. Nuk do të ketë përsëritje të vitit 2004, as veprime të tilla të ngjashme kundër popullit serb”.

Vuçiq ka thënë se iniciativa nga ndërkombëtaret për të shtyrë afatin e riregjistrimit të veturave për 10 muaj synon ta tregojë “palën prishtinase si të mirë”.

Ai thekson se Beogradi insiston gjatë gjithë kohës për targa KS – të statusit neutral, të cilat janë hequr.

Vuçiq ka thënë se thelbi i çështjes së targave është në marrëveshjen e vitit 2011 dhe gjithkund thuhet se bëhet fjala për targa KS, të cilat, siç theksoi ai, janë status neutral, porse Prishtina po e mohon tash.

“Gjatë gjithë kohës insistojmë në këtë, ne themi targa KS, ata thonë se nuk ka më targa KS sepse i kanë hequr”, tregon Vuçiq.

Afati për riregjistrimin e targave nga ato ilegale të lëshuara nga Serbia me akronime të qyteteve të Kosovës për në ato legale RKS përfundon më 31 tetor.

Kryeministri i Kosovës, Albin Kurti, ka thënë se nuk do të ketë shtyrje të afatit.

Vuçiq thotë se kjo po kërcënon paqen e stabilitetin.

“Kërcënimet nga Prishtina se do të vazhdojnë me zbatimin e një aksioni që duhet të tregojë qëndrueshmërinë dhe forcën e tyre dhe të kërcënojnë plotësisht stabilitetin, paqen dhe mbijetesën e popullit tonë në Kosovë e M.”, tha Vuçiq. “Plani i tyre është që të lënë të dalin me targa, por të mos i lejojnë të kthehen në territorin e Kosovës e M. me targa të njëjta. Shteti i Serbisë nuk do të lejojë as pogrom e as vrasje të popullit të vetë”.

Presidenti i Serbisë, Aleksandar Vuçiq, ka thënë se pret që javën e ardhshme Kosova të futet në procedurë për pranimin në Këshillin e Evropës.

“Ajo procedurë mund të zgjasë deri një vit. E keni të qartë se cili do të jetë rezultati”, tha Vuçiq, raporton “B92”. “Është mesazh i qartë se e drejta ndërkombëtare nuk u intereson. Pastaj do të thonë se ti Vuçiqi i vogël, do të bëhesh autokrat dhe pastaj do të fillojnë të bëjnë disa veprime kundër Qeverisë së Serbisë. Ne nuk na kanë dhënë asnjë mundësi, të bëjmë ndonjë gjë. Vendet e QUINT-it gjithmonë do t’i japin mundësi Prishtinës, e kurrë nuk do të marrin ndonjë vendim që do të ishte në favor të serbëve dhe Serbisë”./koha

Kosovë

Lumir Abdixhiku i mbijeton votëbesimit në Kuvendin e LDK-së

Published

12 hours ago

31 January, 2026

Redaksia

Lumir Abdixhiku i ka mbijetuar votëbesimit që e ka kërkuar në Kuvendin e Lidhjes Demokratike të Kosovës (LDK), raportojnë mediat lokale në Kosovë.

Abdixhiku ia ka ofruar Kuvendit të partisë dorëheqjen e tij nga pozita e kryetarit, pas rezultatit të shënuar në zgjedhjet e parakohshme parlamentare të 28 dhjetorit.

Në këtë proces zgjedhor, LDK-ja fitoi 13.24 për qind të votave – rezultati i dytë më i keq qysh prej pasluftës.

Por, disa figura partiake kanë kërkuar dorëheqjen e tij të parevokueshme, duke mos u pajtuar me votëbesim.

Në mesin e tyre është Hykmete Bajrami, e cila ka dhënë dorëheqje të parevokueshme nga pozita e nënkryetares së partisë dhe e ka kërkuar të njëjtën edhe nga Abdixhiku.

“Unë kam zgjedhur të dalë para jush, jo sepse e kam të lehtë, por sepse e ndjej të domosdoshme, sepse kam besuar gjithmonë se njeriu nuk matet kur gjithçka shkon mirë, por kur duhet të flasë edhe atëherë kur fjala i dridhet”, ka thënë Abdixhiku gjatë fjalimit të mbajtur të shtunën para Kuvendit partiak.

Ai ka thënë më herët gjatë së shtunës se Kuvendi është organi më i lartë i partisë dhe rrjedhimisht ai vendos për gjithçka.

“I siguroj të gjithë anëtarët LDK-së që nga ky debat do të dalim edhe më të unifikuar, edhe më të fortë, e më të gatshëm për të ardhmen më të mirë që na pret përpara. Me shumicë votash e përcaktojmë fatin tonë politik”.

Pas fjalimit të Abdixhikut, Kuvendi i ka zhvilluar punimet me dyer të mbyllura.

Anëtari i kësaj partie, Avdullah Hoti e ka shpallur ditë më parë kandidaturën për kryetar të partisë, por të shtunën duket se ka pasur diskutime vetëm për performancën e Abdixhikut.

Lidhja Demokratike e Kosovës është një nga partitë më të vjetra në Kosovë, e themeluar në vitin 1989 nga Ibrahim Rugova.

Ajo ka luajtur rol kyç në periudhën e rezistencës paqësore dhe në ndërtimin e institucioneve demokratike të vendit.

| Radio Evropa e Lirë

Kosovë

Rinumërimi i votave u përmbyll në 34 komuna

Published

3 days ago

29 January, 2026

Redaksia

Në Qendrën e Numërimit dhe Rezultateve deri më tani (29.01.2025 13:11), janë rinumëruar 89,21 % e vendvotimeve apo 2 mijë e 281 vendvotime nga 2 mijë e 557 sa janë në total.

Sipas Komisionit Qendror të Zgjedhjeve, procesi i rinumërimit është përmbyllur në 34 komuna.

Bazuar në dinamikën e procesit, rinumërimi mund të përfundojë pasditen e sotme, ose më së voni të premten, më 30 janar 2026.

Kosovë

Prokuroria në Prizren thotë se të dyshuar të tjerë po intervistohen mbi dyshimet për manipulim të votave

Published

3 days ago

29 January, 2026

Redaksia

Prokuroria Themelore në Prizren ka njoftuar të enjten se një grup i dytë i të dyshuarve është duke u marrë në pyetje si pjesë e hetimit të zgjeruar mbi dyshimet për manipulim të votave në zgjedhjet e parakohshme të 28 dhjetorit – të cilat nxitën rinumërim të plotë të votave.

Në njoftim në Facebook, Prokuroria theksoi se mori informacione shtesë lidhur me dyshimet për manipulim të votave të kandidatëve për deputetë të Kuvendit të Kosovës pas rinumërimit të votave në Prizren.

Ajo nuk tregoi për numrin e të dyshuarve që janë duke u marrë në pyetje në stacionin policor në rajonin jugor të vendit, por tha se ata dyshohen për vepra penale si, shkelja e të drejtave të votimit, korrupsioni zyrtar, si dhe shkelja e detyrës zyrtare.

Ky është operacioni i dytë që autoritetet për zbatim të ligjit e ndërmarrin në Prizren – vendin ku dyshohet se ka pasur më së shumti manipulim votash – pasi javën e kaluar i ndaluan mbi 100 të dyshuar.

Nga mbi 100 të ndaluar në atë aksion, 22 komisionerë dhe një vëzhgues u dërguan në paraburgim për një muaj.

Dyshimet për manipulim të votave të zgjedhjeve të dhjetorit kanë hedhur dyshime serioze mbi procesin zgjedhor, dhe Komisioni Qendror i Zgjedhjeve u detyrua ta bëjë rinumërimin e plotë të votave, pasi kishte gjetur mospërputhje të mëdha në votat për kandidatët për deputetë.

Komisioni bëri të ditur ditë më parë se pret ta përfundojë rinumërimin në fundjavë, pasi tashmë janë rinumëruar rreth 90 për qind e votave.

Rinumërimi në Prizren ka përfunduar tashmë dhe ai tregon një dallim në votat për kandidatët për deputetë para dhe pas rinumërimit.

Të paktën katër kandidatëve të Partisë Demokratike të Kosovës u janë hequr nga mbi 2.000 votat secilit në këtë komunë, përfshirë njërit mbi 6.000, pasi komisioni vërtetoi në rinumërim se atyre u ishin shtuar votat e paqena.

Edhe kandidatëve nga partitë e tjera si ajo në pushtet Lëvizja Vetëvendosje, Lidhja Demokratike dhe Aleanca për Ardhmërinë e Kosovës, u janë hequr vota pas rinumërimit në këtë komunë, por në numër diçka më të vogël.

Operacioni i ri në Prizren vjen po ashtu një ditë pasi 15 kryesues zgjedhorë u ndaluan për 48 orë gjatë një aksioni të ngjashëm në Malishevë. Në shënjestër të aksionit në këtë komunë në pjesën qendrore të Kosovës ishin 18 kryesues dhe 50 komisionerë që kishin marrë pjesë në numërim të votave të zgjedhjeve të dhjetorit.

Ndërkohë, përveç Prizrenit dhe Malishevës, autoritetet janë duke kryer hetime edhe në Ferizaj e Drenas.

Lëvizja Vetëvendosje e kryeministrit në detyrë Albin Kurtit i fitoi zgjedhjet e 28 dhjetorit duke marrë mbi 51 për qind të votave.

Rinumërimi nuk pritet të ndikojë në rezultatin e partive dhe Kurti mund ta formojë qeverinë e re pas certifikimit të rezultateve përafërsisht në fillim të shkurtit.

Në Kosovë manipulimi i votave është vepër penale e dënueshme me burgim.

Megjithatë, së voni organizata joqeveritare, ÇOHU, e publikoi një hulumtim që tregoi se mbi 90 për qind e rasteve për manipulime zgjedhore përfundojnë me dënime me kusht ose gjoba.

| Radio Evropa e Lirë