Partitë opozitare (PDK,LDK dhe AAK), nuk kanë gjetur ende pajtueshmëri sa i përket shpërndarjes së Kuvendit, përderisa në anën tjetër pushteti është deklaruar se po pret unifikim e opozitës për këtë proces.

Pas mbledhjes së kryesisë së kuvendit, Kryetari i Grupit Parlamentar të PDK-së, Abelard Tahiri, ka thënë se datat 30 qershor ose 7 korrik, janë datat e mundshme kur duhet të shkohet në zgjedhje.

Sipas tij, deri të enjten e ardhshme duhet të shpërbëhet Kuvendit, në mënyrë që të arrihen këto data për mbajtjen e zgjedhjeve.

“Si Grup Parlamentar jemi në komunikim intensiv me te gjitha palët që Kosova të shkojë në zgjedhje, qoftë më 20 qershor ose me 7 korrik. Është mirë qe së bashku ta finalizojmë me seancë në javën tjetër qe t’i kapim datat 30 qershor ose 7 korrik. Nuk ka kuptim që tetori të jetë muaj që vendi të shkoj në zgjedhje. Fillimi i kësaj vere është koha, e në të kundërtën do ia zgjasim edhe 8 muaj qe vendi ynë të ketë një qeverisje kaq të dobët. Edhe dështimi në Këshillin e Evropës është arsye shtesë, as se kemi ekonominë, as arsimin andaj iu bëj thirrje grupeve opozitarë qe më 30 qershor t’i drejtohemi kutive të votimit”, u shpreh Tahiri.

Kurse shefi i Grupit Parlamentar të AAK-së, Besnik Tahiri, deklaroi se partia e tij nuk do të mbështesë kërkesën për shpërndarjen e Kuvendit të Kosovës . Sipas tij, Qeveria Kurti duhet të japë dorëheqje.

“Shpërndarja e Kuvendit në këtë fazë nënkupton një dalje, një ‘exit’ për Qeverinë Kurti. Në një farë forme për dështimet e Qeverisë fajin e merr Kuvendi. Qeveria duhet të shkarkohet vet sepse një qeveri e dëmshme duhet të deklarohet vet për dorëheqje”, ka thënë Tahiri.

Në anën tjetër shefja e grupit parlamentar të Lëvizjes Vetëvendosje, Mimoza Kusari – Lila, ka thënë se nuk ka kërkesë zyrtare për shpërndarjen e Kuvendit përkundër që pozita e përkrahë shpërndarjen e Kuvendit nëse ka unitet brenda partive opozitare.

“Ne asnjëherë nuk kemi thënë që kemi frikë nga shkuarja në zgjedhje apo rikonfirmimi i mandatit te sovrani, por nuk mund ta bëjmë këtë me vetëm  një grup parlamentar të opozitës. Nëse është një opozitë e bashkuar që kërkon shpërndarjen e Kuvendit, mund të dakordohemi për datën e përbashkët”, ka thënë ajo.

Kandidatura e përbashkët e Federatës Shqiptare dhe asaj Serbe të futbollit për organizimin e Euro 2027 për futbollistët deri në 21 vjet, ka nxitur reagimin kundërshtues të tifozëve të Kombëtares së Shqipërisë “Kuqezi”.

Pas një deklarate kundër kësaj nisme, të publikuar më 9 maj në rrjetin social facebook, Tifozët Kuqezi, kundërshtimin e tyre sot e shprehën edhe përmes një aksioni simbolik duke hedhur ngjyrë të kuqe në portën hyrëse të FSHF-së, derisa në rrethoja kanë vendosur fotografi të krimeve të Serbisë në Kosovë.

Ky aksion i Tifozëve Kuqezi u përcoll edhe me një deklaratë kundërshtuese të këtij organizimi të përbashkët mes Shqipërisë dhe Serbisë.

“Kundërshtojmë çdo nismë që mundohet t’ia rregullojë imazhin një populli barbar e gjenocidal.

Kundërshtojmë çdo bashkëpunim me vrasësit, me ata që shkaktuan me qindra masakra ndaj shqiptarëve dhe që depërtuan me miliona nga shtëpitë e tyre gjatë gjithë historisë”, shkruan në postimin e Tifozëve Kuqezi.

Policia e Kosovës ka njoftuar se Enver Sekiraqa është arratisur pasi nuk është gjetur në shtëpi gjatë të premtes dhe të shtunës. Ai duhej të kthehej në paraburgim pasi dy ditë më parë, Gjykata e Apelit vendosi për ndryshimin e  masës së sigurisë ndaj tij.

Bazuar në aktvendimin e pranuar nga Gjykata e Apelit dhe mos gjetjes së Sekiraqës, policia ka ndërmarrë masat e nevojshme për informim dhe ndalim të tij, në të gjitha vendkalimet kufitare dhe drejtoritë rajonale policore.

Njoftimi i policisë:

“Policia e Kosovës, bazuar në aktvendimin e pranuar të Gjykatës së Apelit, të datës 17.05.2024, për ndryshim të masës së sigurisë së të pandehurit Enver Sekiraqa, sipas procedurave dhe mandatit të saj ligjor i ka dërguar ftesën të njëjtit, mirëpo i njëjti nuk është hasur në vendbanimin e tij në rrugën ‘Vëllezërit Fazliu’ Prishtinë.

Meqë i njëjti nuk është hasur në shtëpi, Policia e Kosovës, përmes zyrtarëve kompetent, ka njoftuar organet e drejtësisë se ftesa zyrtare i është dërguar të pandehurit Sekiraqa, mirëpo i njëjti nuk është hasur në shtëpi.  Po ashtu sot me datën 18.05.2024, për të zbatuar aktvendimin e Gjykatës së Apelit, ku i dyshuari duhet të dërgohet në paraburgim, zyrtarët policorë e kanë kërkuar të njëjtin, por nuk e kanë hasur në shtëpi.

 Veprimet e mëtejme policore, do të bazohen në procedurat e parapara ligjore, aktvendimin dhe rekomandimet e organeve të drejtësisë. Njëkohësisht Policia e Kosovës ka ndërmarrë masat e nevojshme për informim dhe ndalim në të gjitha vendkalimet kufitare dhe drejtoritë rajonale policore, ndaj të pandehurit”.